يوميات (شقيان وتعبانه ) للشاعر محمد فتحى والشاعرة أسماء محمود

شقيان وتعبانه

بسم الله الرحمن الرحيم
انه فى يوم الثلاثاء 20/11/2007
تم الإتفاق على عمل إنتاج مشترك بين كل من
شقيان / الشاعر محمد فتحى السيد ( أكشن )( الدقلية )
وتعبانه / الشاعرة أسماء محمود ( الأسكندرية )
( شقيان وتعبانه )
هى عبارة عن حوارات زجلية تجسد الحياة الزوجية
والخلافات الأسرية وتتطرق الى المشاكل الاقتصادية والسياسية
من خلال الصور الكوميدية والدرامية
فهيا بنا نتابع يوميات ( شقيان وتعبانه )

شقيان

________________
اه يانا يابوى اه يانا
شقيان ومراتى تعبانه
واقف ع الباب من ساعه
وهيه نايمه ونعسانه
ياوليه هاقع من طولى
وهايشمت فيا عزولى
هاصرخ وهاقول تعالولى
وهازعق واعمل غاره
والم عليكى الحاره

2
تعبانه

اتهد ياخـويا شـــويه
وبلاش تزعيق يامنيل
راجــــع وش الفجـريه
وكمان صحيت العيل
زعبله لسه بـيـــرضع
عمال على صدرى يريل
اصرخ واصحى اخواتى
ولا اندهـله حمــــــاتى
؟؟؟؟؟؟؟؟؟؟؟؟؟

3
شقيان

________________
ياوليه افتحى ياعويله
وبلاش هيصه وهوليله
على ايه تندهى لحماتك
وتلمى علينا العيله
تيجى اخواتى واخواتك
ويضيعوا منى الليله
شقيان ودماغى وجعانى
رجليا يادوب شايلانى
ليلتك سوده يابعيده
نفسى اهفك بحديده
واشوفلى عروسه جديده

4
تعبانه

دايما تعمل شبـــــوره
ونـظامـك ده مــجننى
انا حلوه قوى واموره
بس انت اللى مبهدلنى
مهدود حيلى ومقهوره
مش واخد بـــالك منى
لو مش عارفه طباعك
علمنى انت وفهمنى
افضالى ياخويا شويه
وبلاش بعدك يألمنى
بخدم امك واخــواتك
وولادك اهم قارفينى
؟؟؟؟؟؟؟؟؟؟؟؟؟

5

شقيان

________________
يا حبيبتى افتحى من فضلك
دانا برضه حبيبك راجلك
ماتخفى شويه فى صدك
وتحركى حبه فى رجلك
من زهقى بزعق ليكى
ولا مره صعبت عليكى
هو انتى مشاعرك تاهت
ولا قلبك فى ايديكى
الرقه بتاعتك فين
وكلام العين للعين
نفسى اتهنالى يومين
دالعمر مهوش عمرين
والفرح مساحته قليله
افتحى لكبير العيله
خليكى وليه أصيله
وبلاش خناقات الليله
6
تعبانه

ياللى قلقت منامى خليتنى ليه احتاس ؟
خايفه اهاودك واقوم افتحلك الترباس
تطلب عشا وبعدين تغضب على القلقاس
صــــوتك يجلجل وتفـــــرج علينا الناس
كان نفسى تشكر يوم وتلطف الاحساس
وانا اللى ايدى والله من حقـــها تنباس

7
شقيان

________________
إن كان ع البوس هانبوس
وكمان راح تاخدى فلوس
كان حلم جميل فى دماغى
خليتى الحلم كابووووس
طهقان شقيان طول يومى
احزانى كتير وهمومى
فيها ليه لو بس تقومى
قربت اشق هدومى
8
تعبانه

طلبات كتيره عاوزه عشانها فلوس
والحاجه غاليه والعيشه زى كابوس
خلاص ياسيدى خطى بـرجلك دوس
بوس ايدى حالا واطلع قوام بفلوس

9
شقيان

________________

واخيرا هادخل جــــــــوه
يارب ادينى الــقــــــــوه
أوجاع الدنيا فى جسمى
ومراتى عامله فتـــــــوه
بتبص لى بصه غــــــريبه
باين نـــاويه على مصيبه
قلبالى البيت على اخـره
عامــلالى الشقه زريــبـه
حمكشه نـــــام ع الكنبه
ومعــــــاه زعبله وعنبه
عـــ الارض قضيه وحقنه
وكمان برشامه وكرنبـه
وحلل وصحــــــون وازاز
وبصل على توم على جاز
انا لازم اتجرأ مــــــــــره
واديها كام عكــــــــــــاز
لالا لأ دى ياناس مسكينه
وكفـايه عيشيتها حزينه
والدنيا بحالها كيـــــاس
فى ايديها كمان سكينه
10
تعبانه

خايفه اتهــور واقل عقلى ياناس
اهفه سكينه واوزعــه فى كياس
زهقت م العيشه قرفت منه خلاص
اغسل واكنس واروق عيــاله تتنطط
البيت يصبح فى لحظه حاله متزروط
دلــوقتى يدعى عليا وحاله يتلخبط
عـاوزه اجيبله العشا وزعبله بيعيط

11
شقيان

________________

انــــــــــــا بدعى ليكى مش بدعى عليكى
طول مــ الكياس هنا والسكينه فى ايديكى
وان قولتى ياشقيان قوم قمع البا ميــــــه
هاقـــول يا تعبانه شوبيكى لــــــوبيكى
وأجـــــر لك نــــــــاعم وافضل اداديــكى
ياام المياعه والدلال كــــلك حلاوه وجمال
ياها بشه جيبى قــوى وماليا بيتنا عيال
ايه العفانه ديه دانا دوست على القصـريه
هاتى شوية ميه قـــــــوام اغسلى رجليا
حــــــــوشى قضيه وعنبه وحمى زعبله
لمى بقى بصــــــــــارتك وكسرى القله
اتزاح يا برشــــامه واتاخرى يا كــرنبه
دانا نفسى اتمــد د ســاعه على الكنبه
12
تعبانه

فوق ياراجل هز طولك واصحى حبه
فوق شويه وبص ليا تـــــــزيد محبه
انت يعنى مش ســـــامعنى ولا ايه ؟؟
قوم لاعبنى عشره طاوله نمت ليه ؟؟
قوم ياسيدى قوم يا عمده قوم يابيه
يا خواتى اعضه ولا اخزق له عينيه ؟؟

13
شقيان

________________

ياوليه عيب اختشى وبلاش كلام واعر
انا برضه لحم ودم احساس ومشــــاعر
ايه يعنى ليله تفوت من غير مانتسامر
الليله انا شقيان ومــــــزاجى مش رايــق
برشامه صاحى كمان وحمكشه متضايق
وهمومى بالألــوان وهـدومى مش طايق
انسى بقى الليــــله الصبح اهو شقشق
عاوز اتوه ساعتين نفسى انـام واغرق
خايف يقوم زعبله يصرخ لى ويواء واء
******************
تصبحى على خير غطينى وصوتى
هههههههههههههه
14
قضية

حرام عليكوا يا ناس ناموا بلاش دوشه
اسيب لكوا الأوضة وأهرب من الفرشة
يا ست تعبانه ما ترحمينــــا شويــــــــة
هو دا برضـــه وقــــت ميلاغيـــــــــــه؟
كلها ساعة زمن وأروح على الكليــــــة
صحى حمكشــه يروح يجيب العيــــش
وصحى برشامه علشان يروح الجيـش
يتعلم المرجلـه ينسا الدلع والطيــــش

15
تعبانه

يادى الخيبة اللى حطت عليكى يا تعبانه
شقيان نايم يشخر وقضيه أهى قلقانــه
قوم يا حمكشــــه احجـــز لنفســــك دور
بسرعه إتسحب والبد ياواد فى طابـــــور
زاحم وعافر وثور ماتكونش يوم طرطـــور
اشخط وتنح وهيــج زى هيـــاج الطـــــور
اوعاك تفرت فى عيشك وتكون ولد فرفور

16
حمكشه

________________

يا ناس زهقت خلاص من زحمة الطوابير
حاسس كأنى كلب حاسس كأنى حقـير
خناقات شتيمة وضرب وكأننا صراصــير
الذل غرقنــــــا وشربنــــا منــه كتييـــــــر
نفسى أنول الستر مش غاوى لبس حرير

17
عنبه

ريحتـك بنــج يـــا حقنــه
إتاخرى شويـــه بعـــــيد
شيلى رجلك من جنبى
هو انا جســـمى حديـــد
قربـــت اتعــقـــــد منـــك
وسكوتى معتش يفيـــد
18
حقنه

معلش يا عنبـــه يا أختـــــى
ماهو أصلــه حظى وبختـــى
اسهر على راحة المرضــــى
إن شاء الله مادوخى دوختى
لحـــرارة وضغـــط بقيــــــس
واعمــل ساعـــــى ولبيـــس
لو حزن الدنيــــا فى قلبــــى
لازم اضحـــــــك وأهيــــــــص

19
قضية

همى يا كرنبــه شويـــه
قومى إلبسى جلابيــــه
وبسرعه هاتى لنا قوام
فــول علــى طعميــــــه
أنا عاوزه أجهــز حاجتـى
هاتـــأخر علــى الكليـــه

20
كرنبه

بالراحـــه ياختـى شـويـــه
وبـلاش رســـم وحركـــات
هو انا فى البيت دة هفية
والــــكـل عــــاوز طلبـــات
كأن مافيـش هنا غيــــرى
مع اننـــا سبعــة اخــــوات

21
برشامه

حمكشه لسة ماجاش والعيش طريقه مرار
لازم اروح ع الجيش ومش مهم فطار
انا لسة فى التدريب وعندى ضرب النار
ماقدرش انا اتأخر الجيش مافيهش هزار
هايدخلونى السجن ومايقبلوش اعذار

22
مصروع

يا خالتى تعبانه حمكشه متعور
دماغه مفتوحه وحالته متدهـور
شق الطابـــور والخلـق بتفـرفـر
زعــل سـرور وبسرعــه اتهـــــور
قفش حمكشه وهات على صداغه
وبنص قالب طوب زرعه فى دماغه

23
تعبانه

الحقونى ياناس للواد يروح منى
قلبى عليه اتخلع يامين يطمنى ؟
حمكشه سال دمه وانت ليه نعسان ؟
ياوقعتى السوده الحقنى يا شقيان
انهض وشوف ابنك قبل فوات الاوان

24
شقيان

مالك ياتعبانه بتصرخى كده ليه ؟
بيتنا وقع ولا حريقه فيه ؟؟؟؟
تعبانه جريت هيه الحكايه ايه ؟؟

25
برشامه

حمكشه عافر علشان رغيف العيش
قام انضرب بالبوكس والبراطيش
وسرور ده مدمن غاوى شرب حشيش
فسد حارتنا خلا الشباب طرابيش
انا ماشى يابا الحق ميعاد الجيش