ناصر صلاح ( آدى دقنى ) وتعليق محمد فتحى السيد

النص للشاعر / ناصر صلاح
عضو رابطة شعراء العامية المصرية
_________________________
أدى دقني
( من ديوان من حواديت جدي)
من أغانى حرفوش المجذوب
@@@@@@@@@
وكنت اطلع على المادنه
واصلى الجمعه ويا الطير
على سطوح مسجد ابن سلام
ومهما يقول خطيب الجمعه ويزعق
ما كنتش ويا أصحابى نبطل لو دقيقه كلام
وقبل اما الصلاه تخلص
ويتلفت يمين وشمال
نقول له سلام
وأجرى اخرج فى إيد جدى وفى حمايته
ويطلع خادم الجامع..
بخرازنته
يقابل باقى أصحابى
اللى نازلين جرى م المادنه
ويختم الصلاه بيهم
@@@@
ونقرا الفاتحه انا وسيدى لابن سلام
وكل اللى عليه سلم ويدعى له
يطاطى عليا ويسلم ويدعى لى
يجيب لى البوظه من يوسف
ودندرمه
وياخد للولاد فى الدار
شيلة يوسف
على ابو صره
يعلق يده فوق كتفى
وفجأه يقول
تصور إن كان بيصلى ويانا النوبادى حمار
واقول له ازاى
دا جد يا جدى وللا هزار
يقول طب خطبة الجمعه كانت عن ايه؟؟
وأغرق فى العرق والخوف
يقول لى شوف
وصدقت ان كان فى حمار
@@@@@
وقبل ما جدى يتمادى فى نأرزته
نكون فى الدار
فتتحول خلية نحل
خلانى يفرشوا الحصران
وخالاتى تجيب الأكل م القاعه
وماشيين صف بالترتيب
تقولش انفار
وستى تشيل على راسها مشنة عيش
وحلة الزفر فى ايدها
وتقعد ستى قعدتها
بجار جدى وانا بجارها
وستى تقطع اللحمه وبتوزع
ونايب جدى يبقى كبير
ونايبى كمان
ما انا لسه يا خلق صغير
ولا يفضلش غير ليها جناح رقبه
وجدى يقول يا أنيسه
مافيش حته من الرقبه
تقول له ان شالله أطفحها
ما حد واكلها إلا انت
وتييجى القطه وتنونو
فتديها الجناح راضيه
ودايما ستى كات تدى ولا تاخد
دا حتى فى يوم ما سفرت روحها للفردوس
فى ليلتها ما نامتش
وكات بتدق فى الكفته
لحد إيديها ما ازرقت
وخالاتى يقول لها خلاص يا امه
نكمل دقها بكره
تقول بكره هتحتاسوا
أكيد ليها هتحتاجوا
وصلت فجرها حاضر
وقالت للندا حاضر
ودايما ستى كات تدى ولا تاخد
@@@@
وبعد الأكل بنحلى
وفوق المصطبه نشرب
نبيذ الشاى على القلاويح
ونار المنأده معتق
وجدى يسلك الجوزه
ويستقبل هوى العصريه ويفرق
على خلانى وخالاتى مهام الغيط
وينده فوم ياواد يا عبيط
تعا جانبى وهات واجبك
ويسمع سومه ويغفل
واهو قاعد وراكن ضهره ع الحيطه
وانا قاعد بجار منه
أكمل واجبى اورى له
يصحح لى
ومره يقول أدى دقنى
ومره يقول
هنبقى ياواد شاعر فنان
بك اتباهى وتسعدنى
ومات جدى وحزّنى
ومات جدى وبقيت شاعر
ولكن شعرى فى همومى
بيسجنى يعذبنى
ولما الذكرى بتزورنى
يسيبنى أعيش معاها ساعات
يسيبنى اشعر بإنى حى
لما بافتكر الاموات

تعليق الشاعر محمد فتحى السيد
____________________
نص جميل للشاعر الراقى ناصر صلاح
اعادتنا كلماته الى الزمن الجميل حيث البراءة
والتأمل واللعب والمرح والانطلاق دون قيود
والاحساس بالونس والحب والتعاون والاخلاص
والأمن فى كنف العائلة الكبيرة المجتمعة فى بيت واحد

استطاع الشاعر ان يجسد لنا بعض المشاعر الانسانية العالية
المتبادلة بين افراد تلك الاسرة الريفية الطيبة المتدينة الكريمة
وحين تحدث عن الجدة اعطانا مثالا فى الكرم والتضحية
والتفانى من اجل اسعاد الزوج والابناء والاحفاد
يالها من متع وخيرات افتقدناها
انه التواصل وصلة الرحم . فتلك الأشياء نادرا مانجدها فى وقتنا هذا
والجميل ايضا ان الشاعر ذكر اسم الجدة دون غيره
من اسماء بقية العائلة وهذا يؤكد لنا انها كانت الاكثر تأثيرا عليه
والأقرب الى قلبه
كما ان الشاعر ذكر لنا اسم المسجد
لنعلم اين قضى طفولته ؟ وكيف كانت ؟
فى هذا المكان الواقع فى أحضان الطبيعة
ويجمع الطيبين البسطاء الانقياء المتصوفين بطبيعتهم
ورغم اعجابى بالنص وتأثرى ببعض ماجسده الشاعر من مشاعر
الا اننى ارى ان النص لم يكتمل بعد
لأن موضوع النص مازال مفتوحا ويحتمل المزيد من الاشياء الهامة
التى لم يتطرق اليها شاعرنا الجميل
ولكى لايحمل كلامى غموضا سأوضح أكثر
فمثلا فى ذلك التوقيت لم يكن فى هذا المكان ( تلفاز )
لتجتمع امامه العائلة فى المساء كما يحدث الان !!
ولكن كانت هناك جلسات السمر وحواديت الجدة وحكايات الجد
ولم تكن الملاهى او الالعاب متوفرة أيضا
فكان الاطفال يبتكرون العابا من اروع ماتكون فى اسعاد بعضهم البعض
وغيرها الكثير والكثير من الاشياء التى يمكن لشاعرنا ان بتطرق اليها بشكل جيد
وبصياغة مشوقة . وتدعيمها بالصور التى لاتدع مجالا للمتلقى للشعور بالملل
بسبب طول النص . ربما تكون قد تناولت كل التفاصيل فى ديوانك
الذى لم أقرأه بعد . وان لم تكن قد فعلت
فتلك وجهة نظرى الخاصة
ولك ان تأخذ بها او تدعها وتمر بسلام
ذاهبا لمسجدك ابن سلام
_________________
محمد فتحى السيد