فجأة ( للشاعر مدحت عطية )

فجأه

بعد ما قولنا ناموا
أتاريهم صحيين
بعد ما قولنا راحوا
أتاريهم .. جايين
أتاريهم قاموا
مع بكره .. متواعدين

فجأه قاموا
مسكو شمعه
خلو الضلمه تركع
فجأه خطو خطوه
صعب .. ترجع

وسط السكات
خلو الكلام الحلو
يطلع
خلو العيون
خلو الوشوش
الباهته تلمع

خلونى أبص
على الشمس .. بجبينى
خلو الهوان
يخطينى

فجأه لاقتنى
بتنفس

والنَفَس مكفينى
فجأه قمت من مكانى
أعد .. فى سنينى

فجأه حسيت
إنى حى
حسيت إنى هرجع
حسيت إنى جاى
حسيت إن الليل
الـ طال
مخبى وراه ضى

من ديوان ( أنا كلمة ) للشاعر مدحت عطية